Република Северна Македонија (РСМ) и Меѓународната банка за обнова и развој го потпишаа Договорот за заем во износ од 13,8 милиони евра на 6 февруари 2020 година, за имплементација на Проектот за администрација на социјално осигурување – SIAP.

Министерството за социјална политика, демографија и млади (МСПДМ) е надлежно за спроведување на проектот, кој стапи во сила на 2 март 2020 година. Во мај 2024 година, Банката одобри продолжување на периодот на имплементација на проектот SIAP до 30 јуни 2026 година.

Целта на проектот е да се подобри квалитетот на услугите во управувањето со системот на социјално осигурување и да се зајакне регулаторната рамка за лицата со попреченост и за опасните занимања. Проектот е насочен кон три меѓусебно поврзани области на реформа:

Единствен унифициран регистарски систем (SURS): воспоставување на консолидиран регистар кој ги интегрира сите евиденции од социјалното осигурување. Овој систем го намалува дуплирањето, ја зголемува точноста и им овозможува на граѓаните транспарентен и ефикасен пристап до нивните права.

Централна единица за сертификација и координација на попреченост (CDCCU): воспоставување единствен систем за проценка на попреченост кој применува усогласени, транспарентни и на права засновани критериуми, во согласност со Конвенцијата на ООН за правата на лицата со попреченост (CRPD). CDCCU има за цел да ги елиминира паралелните постапки, да ја намали дискриминацијата и да обезбеди побрзо признавање на правата.

Реформа на вработување, професионална рехабилитација и пензионирање за опасни занимања (ESP): развој на модерен систем за рехабилитација и поддршка при вработување за лица со попреченост, паралелно со ревидиран и поправеден модел за пензионирање во опасни занимања кој го балансира здравјето на работниците со одржливоста на пензискиот систем.

Овие реформи се однесуваат на чувствителни прашања како што се признавање на права, услови за пензионирање и пристап до вработување. Затоа успехот зависи не само од техничката имплементација, туку и од јавната доверба, транспарентноста и вклученоста.